Koll an Aktioun 2022

No zwee Joer fënnt de Koll an Aktioun endlech erëm um historesche Site vum Schiefermusée zu Uewermarteleng statt. Um Päischtweekend vum 4. a 5. Juni wäert an dëser 7. Editioun erëm en ofwiesslungsräiche Programm fir grouss a kleng ugebuede ginn. Déi läscht zwee Joer hu gewise wéi wichteg et ass, Plazen ze schafe wou Leit sech kënne begéinen a kulturell austauschen!

Wéi fir all Editioun, gëtt beim Festival wäert drop geluecht, sech un déi ganz Famill ze riichten, Natur an Ëmwelt ze respektéieren a lokal Acteuren a Veräiner mat anzebannen. Dofir ginn esouwuel Concerten a Spektakelen mee och eng Expo esou wéi en Marché de créateurs, Kanneratelieren, wéi och e kulinaresche Programm ugebueden.

An noer Zukunft wäerte weider Informatiounen zum Programm annoncéiert gi. Bleift iwwert eisen Internetsite oder eis Social Media Kanäl um lafenden, fir näischt ze verpassen! De Festival ass am Wandel a fënnt dëst Joer an engem bëssen anerem Kader statt. Dëst gëllt och bei den Ticketen, dofir maacht Iech bäi, dës sinn nämlech dëst Joer limitéiert. Hei um Site kritt Dir Dagesticketen ze kafen. Fir Kanner bis 15 Joer inclus ass d’Entrée gratis. D’Entrée mam Kulturpass ass 1,50 €. Schreiwt eis w.e.g. am Virfeld e Mail: marketing@kollanaktioun.lu

Iwwer de Site : Schiefermusée Haut - Martelange

Do, wou fréier de Schiefer aus dem Buedem geholl an uewen an den Atelieren zu fäerdege Produkter weiderverschafft gouf, ass haut de Schiefermusée Haut-Martelange. Eigentlech ass et ee ganzt Duerf mat ënnerierdesche Grouwen, Industriegebaier a Wunnhaiser. D’Architektur erschaaft een homogenen Ensembel a verzaubert duerch den industrielle Charme. Den Zäitsprong ass perfekt. De Schiefermusée Haut-Martelange ass ee grousse Site vun 8 ha a bedeit lieweg Geschicht a Geschicht erliewen.

E Familljen-, Musek-, Kultur- & kulinaresche Festival am Nord-Weste vu Lëtzebuerg

Säit 2014, offréiert de Koll an Aktioun wärend dem Päischtweekend eng breetgefächert Programmatioun fir Familljen, Kulturbegeeschterter, Museks-Enthusiasten a kulinaresch Genéisser. Iwwert déi lescht Joeren, ass de Festival, dee virun der eenzegaarteger an historescher Kuliss vum Schiefermusée zu Uewermaartel ass, en wichtegen Datum am lëtzebuerger Kulturagenda ginn. Méi wéi 3.000 Visiteuren besichen all Joers de Festival. De Koll an Aktioun gëtt vun 30 Fräiwëllegen organiséiert, déi net nëmmen hier Léift zu der Musek, mee och zur Ëmwelt deelen. Den Impakt op d’Natur ze minimiséieren ass ee vun de wichtegste Bestanddeeler vum Koll an Aktioun. Nohaltegkeet ass de Schlëssel!

2020: E Koll an Aktioun on AIR

D’Pandemie huet jidderee virun nei Erausfuerderunge gestallt. De Kultursekteur war dovunner ganz haart getraff, an deemno och de Koll an Aktioun. Kuerzfristeg gouf de Festival dofir a senger ursprünglech geplangter Versioun ofgesot. An awer, war et eis wichteg eng Méiglechkeet ze hunn aus dem Alldag auszebriechen! De Koll an Aktioun sollt net einfach fale gelooss ginn, mee e goung on AIR!

Zesumme mam radio 100,7 konnt de Festival online an iwwer Radio stattfannen. Seng Philosophie, déi op véier Volete berout, gouf dobäi erhalen: e kulinareschen, musikaleschen a kulturelle Festival fir déi ganz Famill. Iwwer Live-Stream op verschiddene Plattforme souwéi um radio 100,7 goufen ënnerschiddlech Workshops, vu bastele bis kachen, Yoga-Coursen, Bicherliesunge fir Kanner a Concerten ugebueden. Hei drënner kënnt Dir nach eng Kéier de ganze Festival kucken:

De Koll an Aktioun ass opgebaut ronderëm 4 Themen:

Musek

National an international Musek-Acts wäerten Iech iwwert de Weekend mat hire Kläng begeeschteren. De Koll an Aktioun limitéiert sech net op ee bestëmmte Museks-Stil: vun Jazz iwwer Hip Hop bis Indie Rock, ass fir jiddereen eppes dobäi.

Famill

Koll an Aktioun ass e Festival fir déi ganz Famill. Duerfir ass eis wichteg mat eisem Programm gläichzäiteg eis jéngst wéi och eis eelst Visiteuren uschwätzt. Stroossekënschtler, Workshoppen an Animatioun fir Kanner a Familljen, wäerten jidderengem flott Momenter bereeden

Kultur

Léiert eise Site kënnen an d’Geschicht déi derhannert stécht. Entdeckt de Schiefermusée zu Uewermaartel esou wéi d’Aarbecht vun nationalen an internationalen Artisten, Kréateuren an Handwierker.

Kulinarescht

Joer vir Joer wiisst d’Offer vum Iessen um Koll an Aktioun a gëtt méi villfälteg. D’Iessstänn konzentréieren sech op lokal a Bio-Liewensmëttel (verschiddener kommen esouguer aus dem Festival sengem eegenem Gaart)! Dir hutt de Choix.